1220 ca

Uronica et Veronica

Quoniam autem de quinque patriarchalibus ecclesiis Romae tres istas principaliores esse constat, Sancti Salvatoris scilicet Lateranensem, Sanctique Petri, et Sancti Pauli, super his tribus quaedam adijcere non incongrua nec incompetentia ex chronicis et libris historicis studioso labore congesta curavi. De duabus igitur iconiis Salvatoris, Uronica scilicet et Veronica, quarum una apud Lateranum, altera vero apud Sanctum Petrum inter reliquias pretiosiores habetur, primo dicetur.

Lucas vero Evangelista medicus erat, tam corporum egregius quam animarum eximius, et pictor quoque mirabilis; qui cum matri Jesu post ascensionem adhaesisset, inquit ei Maria: “Luca, quare non depingis Filium meum?” Cum ergo ipsa indicante prius singula membra pinxisset, et post multarum deletionum correctiones tandem in unam imaginem conjuncta matri obtulisset, ipsa imaginem diligentius intuita subjunxit: “Hic est Filius meus”. Tales fecit duas vel tres, quarum una Romae habetur apud Lateranensem, scilicet in sancta sanctorum. Quam cum papa quidam, ut fertur, inspiciere praesumpsisset, statim lumen oculorum amisit, et deinde cooperta fuit auro et argento tota praeter genu dextrum, a quo oleum indesinenter emanat. Haec autem imago dicitur Uronica, quasi essentialis. Alia autem imago Romae habetur, quae dicitur Veronica, a Veronica matrona quae tamdiu desideraverat et orationibus Dominum impetraverat videre; quae semel exiens a templo Dominum obvium habuit dicentem: “Verona, ecce quem desiderasti”. Quem cum intuita fuisset, ipse peplum ejus accipiens impressit vultu suo, et reliquit in eo expressam imaginem suam. Haec in magna similiter reverentia, et a nemine, nisi per velorum quae ante dependent interpositionem inspicitur; et haec est apud Sanctum Petrum. Haec autem illa, ut legitur, mulier fuit, quae tangens fimbriam vestimenti Jesu a sanguinis profluvio curata fuit. Legitur etiam quod eadem mulier post Christi passionem Romam de Hierosolimis venire coacta, eamquem secum portare quam relinquere voluit compulsa, statim ut Tiberio Caesari allata fuit curatus est a morbo incurabili quo laboraverat. Dicunt autem quidam vocabulo alludentes, Veronicam dici, quasi veram iconiam, id est, imaginem veram.

GIRALDI CAMBRENSIS, Speculum Ecclesia, Cap VI, De tribus patriarchalibus ecclesiis, inter dictas quinque principalioribus, quaedam memoratu digna non incompetenter apposita.

Testo in italiano


GUTE-URLS

Wordpress is loading infos from clicart

Please wait for API server guteurls.de to collect data from
www.clicart.it/giacomo/Displa...